حسابات موقف أمومي قبل عدة سنوات

لما كان ابني عمره ٩ سنين أصر إنه يجيب ألعاب بمبلغ ما كنت متفقة عليه معاه…

لما كان ابني عمره ٩ سنين أصر إنه يجيب ألعاب بمبلغ ما كنت متفقة عليه معاه … كنا متفقين نجيب اللعب الي يختارها هو وأخته ضمن مبلغ محدد… أخته اختارت لعبتين و راحت السيارة، وهو أصر يجيب ثلاث لعب و وقتها أنا ما قبلت .. وصار يبكي بالمحل وبالشارع ويصرخ ويضرب وما قبل يطلع السيارة، ظللت واقفة معه بالشارع تقريباً نص ساعة عشان أذكره بالاتفاق وأصريت على موقفي .. مع إني كنت بتقطع من جوا، نفسي أسعده وأخليه مبسوط بس قلت لو أعطيته اللعبه الزيادة الي هو طلبها عمره ما حيلتزم بأي اتفاق … ولازم يعرف انه الدنيا مش سهلة.. مشي الحال واقتنع بس على زعل .. الآن، صار عمره ١٨ وأنا بظل أتذكر الموقف ، بوجعني قلبي عليه .. وبقول يا ريتني طاوعته .. ماكان حيصير اشي .. مهو طلع ملتزم ومسؤول … فناديته وحكيت معه عن الموقف وهو متذكره مش ناسيه .. قلت له أنا بعتذر اذا أفسدت متعتك بس أنا كنت بربيك من خلال المفاهيم والعلم إلي كان متاح لي بهداك الوقت والي كنت مقتنعة فيه … ولازم أعلمك انه الدنيا فيها التزام ومسؤولية .. الدنيا مش سهله .. ولازم تتعلم انت هاد المفهوم من خلال تعاملي معك .. لازم تعرف انه في صعوبه عشان تحصّل الي بدك ياه قاطعني وقالي لا تبرري موقفك .. أحسن انك اتصرفت معي هيك .. هاد الصح، ما حب يشوفني ضعيفة قدامه وموجوعة … فحاول أن يخفف عني وبنفس الوقت كان مقتنع إنه إلي صار لمصلحته .. قالي : لو ما عملتِ هيك كان أنا لهلأ بتدايق وبنقهر على أي شي ما حصلت عليه، ما كان حيصير عندي قناعة … هلأ الحمدلله هو أكتر واحد بأولادي عنده حس مسئولية عالي والتزام بكل كلمة بوعدها .. مش ممكن ينسى وعد وعده لأي حد .. وحريص بمصروفه .. ما بشتري إلا الشغله الي بحتاجها .. حتى لو معه فلوس … قنوع جداً (مادياً ومعنوياً) … ما بشتري اذا ما حس إنه "محتاج" الغرض … 🎯 مش كل شي بشتهيه الطفل لازم أشتريه .. لازم الطفل يسمع (لأ) ويتعرض لإحباطات … رغباته مش "أطلب تُطاع" هاي الإحباطات جزء من نموّه النفسي، ومن خلالها رح يفهم كيفية اندماجه بالمجتمع الخارجي . الحرمان تربية ، بس نعرف كيف نطبقه من خلال منع "الرغبات مش منع "الاحتياجات النفسية".

رشا توفيق

10/10/2026